Ani 90 : a statüra europeana

Ünt’i ani 90 l’AS Mu̍negu a̍ razuntu u “gotha” europea̍n cun dui ti̍tuli, üna Cupa de França, tre meze-finale e üna finala europeane.

I ani 90 a̍n cumençau cun turna ün a̍utru sücessu ün Cupa de França. Cun ün go̍l de Gérald Passi marcau sca̍iji sci’u cou d’a fin d’a partia, l’AS Mu̍negu a̍ vintu contra l’OM, e cusci̍ fandu, a̍ piyau a revi̍ncita sci’a finala d’u 1989. Ünt’u campiunatu ë cose sun diferente : l’AS Mu̍negu a̍ finiu a u segundu postu ün 1990-1991 darre̍ l’OM e a̍ pairau l’anu dopu sempre darre̍ d’achëla sqadra marsiyesa. Achëst’ü̍rtima stagiu̍n e̍ sta̍ l’üna d’ë ciü̍ bele ma tambe̍n d’ë ciü̍ triste d’a sto̍ria d’u clüb. De fati, l’AS Mu̍negu a̍ partiçipau a tre cumpetiçiue : Campiunatu, Cupa de França, Cupa d’ë cupe, ma u clüb a̍ finiu a stagiu̍n sença nüsciü̍n trufeu. Qalificai per a finala de Cupa de França dopu üna vito̍ria contra l’AS Cannes ün meza-finala, i Russi e Gianchi a̍n mai giügau a finala per ca̍usa d’u drama de Furiani capitau prima che l’a̍utra meza-finala fussa giüga̍. Üna trage̍dia ch’e̍ propi capita̍ a vigi̍lia d’a prima finala europeana de l’AS Mu̍negu contra u Werner Breme a Lisbona. A rescontra s’e̍ giüga̍ ünt’u stadi d’a Luz sença gio̍ia, davanti a spetatui prun ündiferenti e l’AS Mu̍negu a̍ mancau a so’ rescontra, persa 2-0, lasciandu cusci̍ a Cupa d’i Vincitui de Cupa a i Tedeschi.

Jean-Luc Ettori, l’omu d’ë 755 rescontre

A ün’e̍puca qandu sulu u vincitu̍ d’u campiunatu purëva giüga̍ a Liga d’i Campiui, l’AS Mu̍negu a̍ prufitau d’a disqalificaçiu̍n de l’OM ün 1993 per descrœve u nœvu modu de fa̍ d’a C1, cun üna “phase de groupe” ünvece de fa̍ cuma prima “i primi giri”. Ma se i omi d’Arsène Wenger sun riesciüi a arriva̍ ün meza-finala persa margradu tütu cun prun de briu contra u fütüru vincitu̍ milanese, pecau, ün campiunatu a̍n sulu pusciüu fini̍ a u nonu postu margradu üna d’ë ciü̍ bele sqadre cun de numi tali Djorkaëff, Thuram, Petit, Klinsmann, Scifo… Â fin d’achësta stagiu̍n 1993-1994, Jean-Luc Ettori, omu d’u ciü̍ gran nü̍meru de rescontre ün Prima Divisiu̍n (D1), a̍ partiçipau â so’ 755e̍sima e ü̍rtima partia cun ë curue munegasche deventandu cusci̍ l’omu d’u reco̍rd d’ë rescontre giügae cun l’AS Mu̍negu e tambe̍n chëlu d’ë rescontre giügae ün Prima Divisiu̍n (D1) (602, reco̍rd batüu ün 2013 da Mickaël Landreau). E dopu set’ani de bon travayu, Arsène Wenger a̍ lasciau u postu d’üntrenau̍.

U regnu munegascu

Uramai, dopu ün üntermesu assügürau da Gérard Banide che a̍ utegnüu a qalificaçiu̍n ün Cupa de l’UEFA, e̍ Jean Tigana u nœvu üntrenau̍. E̍ ëlu, l’ün d’u famusu “cadru ma̍gicu” (Petit, Tigana, ?) ch’a̍ menau l’AS Mu̍negu a u so sestu ti̍tulu de Campiu̍n de França â fin d’a stagiu̍n 1996-1997, ch’a̍ pairau cun ë çelebraçiue ünt’u Principatu d’i sete çentu ani de regnu d’a famiya Grimaldi. E, u pü̍blicu munegascu a̍ pusciüu se sciala̍ cun üna d’ë ciü̍ bele sqadre d’a sto̍ria d’u clüb, sempre gestia da Jean Tigana, cun, tra a̍utri, Barthez, Petit, Benarbia, Henry, Anderson, Ikpeba… Üna stagiu̍n ecessiunala a tüt’i niveli cun üna nœva meza-finala europeana (C3) ma, per disgra̍çia, persa sta vota contra l’Inter Milan.

Cun u “gotha” europea̍n

A stagiu̍n seghenta e̍ sta̍ cusci̍ bela. Margradu a partença de Sonny Anderson, Manu Petit o ancura Gilles Grimandi, l’AS Mu̍negu a̍ finiu qarta d’u campiunatu e e̍ riesciüa a arriva̍ ün meza-finala d’a Liga d’i Campiui, dopu d’ave̍ eliminau Manchester United a Old Strafford ün qartu de finala cun ün go̍l d’antulugia de David Trezeguet. Ma e̍ turna üna sqadra italiana, sta vota a Juventus, che a̍ privau i munegaschi d’üna finala cusci̍ tantu spera̍, gagnandu 4-1 a partia a l’anda̍. A vito̍ria d’i Russi e Gianchi 3-2 â partia de returnu nun a̍ bastau per qalificali, ma l’AS Mu̍negu se n’e̍ surtia cun unuri e uramai, fava parte d’u gotha̍ europea̍n d’u futbo̍l. A stagiu̍n 1998-1999 a̍ vistu parte l’üntrenau̍ Jean Tigana, rempiaçau da Claude Puel ün zena̍ d’u 1999. Margradu ün terçu postu ün campiunatu, a stagiu̍n e̍ sta̍ menu bela.

Campiu̍n d’u Mile̍nium

Ma chële de̍ije anae de prun bela fatüra se sun finie ancura meyu che avëvun iniçiau, cun ün se̍timu ti̍tulu de Campiu̍n de França â primavera d’u 2000. A sqadra d’u Mile̍nium gh’avëva giüga̍iri ecessiunali tali Barthez, Marquez, Lamouchi, Gallardo, Trezeguet o ancura Simone che a̍n fau ientra̍ l’AS Mu̍negu, da a gran porta, ünt’u XXIe̍simu se̍culu.