Ani 80, tra i ciü̍ forti
Ünt’i ani 80, ben ancura̍ ünt’u mundu d’u futbo̍l d’Europa, cun tanti trufei e po̍dium l’AS Mu̍negu e̍ sta̍ propi tra i ciü̍ grandi d’u futbo̍l.
Trei prun famusi üntrenaui se sun sücedüi ünt’i ani 80 : Gérard Banide, Lucien Muller, Stefan Kovacs, pœi e̍ arrivau ün 1987 ün zu̍venu “coach” Arsène Wenger. E̍ ëlu che va̍ propi a da̍ a l’AS Mu̍negu üna vera statüra europeana. Dopu a Cupa de França d’u 1980, i Russi e Gianchi a̍n gagnau ün 1981-1982 u qartu ti̍tulu de Campiu̍n de França d’a sto̍ria d’u clüb, segundu trufeu per l’üntrenau̍ Gérard Banide. Dopu ün sestu postu delüdente ün 1982-1983, Lucien Muller e̍ arrivau per dirige a sqadra ün 1983-1984, üna stagiu̍n sca̍iji sto̍rica. De fati, l’AS Mu̍negu e̍ sta̍ prun vijina de riesce ün segundu dugëtu : a̍ finiu prima ün campiunatu pari cun Bordeaux ma cun menu de go̍l, dunca u clüb e̍ stau classificau segundu, e a̍ persu ün finala d’a Cupa de França contra u FC Metz.
Nascença d’u nœvu Stadi Lui̍ IIndu
A stagiu̍n 1984-1985 e̍ sta̍ marca̍ cun l’inaugüraçiu̍n d’u nœvu Stadi Lui̍ IIndu. Ün biju̍ d’architetüra de 20 000 posti setai (ancœi limitau a 17 000). A l’inaugüraçiu̍n, u stadi prupusava, ün ciü̍ d’u terre̍n de futbo̍l, üna pista d’atletismu, üna sala unispo̍rt de 3 000 posti, üna piscina oli̍mpica, tante sale de sport, a sede d’u clüb, u çentru de furmaçiu̍n, e tambe̍n ün’üniversita̍ e tanti ufiçi. L’AS Mu̍negu a̍ turna vivüu üna stagiu̍n cina de passiue. Per l’AS Mu̍negu u campiunatu e̍ stau, ancura üna vota, sca̍iji ün stramacu cun ün terçu postu d’unu̍, ma a sqadra s’e̍ aganta̍ â Cupa de França e a̍ vintu, ün finala, u “Paris Saint-Germain” ünt’a so’ tana : u so stadi, u Parcu d’i Pri̍ncipi.
I “ani Wenger”
Dopu due stagiue ciü̍ o menu bele, a vegnüa d’Arsène Wenger ün 1987-1988 a̍ marcau l’iniçi de nœvi tempi. Cou d’esperimentu, cou da mestre per u zu̍venu üntrenau̍ uriginari d’Alsace che, sü̍bitu per a so’ prima stagiu̍n, a̍ menau a sqadra a vince u so qintu ti̍tulu de Campiu̍n cun, ün particülari, dui giüga̍iri ünglesi che a̍n marcau i spi̍riti : Glenn Hoddle e Mark Hateley. Terça d’u campiunatu ün 1988-1989, l’AS Mu̍negu a̍ giügau üna finala de Cupa de França legenda̍ria, pecau, persa 3-4 contra l’OM. Ün ciü̍ d’ailo̍, u clüb s’e̍ qalificau per a prima vota d’a so’ sto̍ria per i qarti de finala d’a Cupa d’Europa d’i Clüb Campiui, fütüra Liga d’i Campiui. Era tambe̍n per chëla stagiu̍n ch’u fütüru Balu̍n d’Oru, Georges Weah, a̍ fau i soi primi passi ünt’u Principatu. Stu belu percursu s’e̍ prusseghiu ün 1989-1990 da ün’a̍utra aventüra ün Cupa d’ë Cupe, cun üna meza-finala persa contra a Sampdoria de Ge̍nua. L’AS Mu̍negu esistëva, uramai, a u nivelu europea̍n.
