Ani 70, a Diagunala s’e̍ afirma̍
A u cuntrari d’i ani 60, i ani 70 a̍n cumençau mudesti ma a̍n finiu ecelsi per l’AS Mu̍negu d’u trio̍ Petit/Dalger/Onnis. Achësta perioda marca tambe̍n a nascença d’a sqadra munegasca.
Dopu due stagiue ün Segunda Divisiu̍n (D2), i Russi e Gianchi a̍n rezunzüu a Prima Divisiu̍n (D1) ün’a̍utra vota, ma sulu per a stagiu̍n 1971-1972. Carun turna ün Segunda Divisiu̍n (D2) ma, ancura ben, sulu per üna stagiu̍n 1972-1973, e dopu l’AS Mu̍negu s’e̍ stabilia ün Prima Divisiu̍n (D1) per trei ani, cun – ün passandu – üna finala de Cupa de França persa contra Saint-Etienne ün 1974. Cuma qatr’ani prima, passa̍ ün Segunda Divisiu̍n (D2) ün 1976-1977 a̍ dürau sulu üna stagiu̍n.
Iniçi de “l’era Campora”
Man a man, a sqadra va̍ a retruva̍ u so briu suta l’ambi d’ün zu̍venu presidente : Jean-Louis Campora, üntrunizau ün 1975. Sciü̍ d’u terre̍n, de giüga̍iri emblema̍tichi menun a sqadra, tale u capitani Jean Petit, u talentüusu Christian Dalger, e da sügüru u pruli̍ficu ataca̍n argenti̍n, Delio Onnis, che e̍ deventau l’omu cun u ciü̍ gran nü̍meru de go̍l marcai cun l’AS Mu̍negu, 223, ma tambe̍n recordman cun 299 go̍l ün Prima Divisiu̍n (D1), a fütüra Prima Liga (L1).
Sü̍bitu Campiu̍n : gran pruessa d’u clüb uramai ün Prima Divisiu̍n (D1)
U fatu de crea̍ u Çentru de Furmaçiu̍n ün 1975 a̍ dau nœve perspetive a u clüb. Vite vite achësta iniçiativa va̍ a s’anunça̍ frütüusa. Ün 1977-1978, a sqadra e̍ riesciüa̍ a iesse Campiunatu de França u stëssu anu d’a remunta̍ ün Prima Divisiu̍n (D1). Ettori, Vannucci, Gardon, Courbis, Vitalis, Correa, Moizan, Noguès, Chaussin, Dalger, Onnis, Rouquette e François a̍n scritu i soi numi ünt’a sto̍ria d’u clüb, e tambe̍n u ghida Lucien Leduc, l’omu d’i primi ti̍tuli turna vegnüu sciü̍ d’u bancu russu e giancu cun sücessu stramaraviyusu. Cusci̍ e̍ nasciüa l’AS Mu̍negu d’i tempi muderni.
Banide e i zu̍veni a u putere
Dopu a partença de Lucien Leduc e l’arrivu a u postu d’üntrenau̍ de Gérard Banide, a vito̍ria finala ün Cupa de França â fin d’a stagiu̍n 1979-1980 a̍ marcau a fin d’üna generaçiu̍n che, cianciani̍n, va̍ a lascia̍ u postu a i zu̍veni. Bellone, Amoros, Bravo, Bijotat, Ricort, Couriol e tant’a̍utri zu̍veni talenti a̍n razuntu, l’ün dopu l’a̍utru, a sqadra prufessiunala e a̍n menau l’AS Mu̍negu a ë ciü̍ a̍ute çime d’u futbo̍l.
