Ani 2010 : a Renascença
Dopu se iesse renfurça̍ ün Segunda Liga (L2) da u 2011 fint’ün 2013, l’AS Mu̍negu a̍ retruvau a Liga d’i Campiui â primavera d’u 2014 e a̍ gagnau u so utavu ti̍tulu de Campiu̍n de França ün 2017 dopu üna stagiu̍n da nun crede !
E̍ cun üna trunada che a̍ cumençau a sto̍ria a ciü̍ cuntempura̍nea de l’AS Mu̍negu. Â fin d’üna lenta agunia per a stagiu̍n 2010-2011, u clüb e̍ stau relegau ün Segunda Liga (L2) per a prima vota despœi trenta çinq’ani ! Che sbatu ! Ma, dopu üna sula stagiu̍n, u clüb e̍ riesciüu a se ne sorte.
Da ün estremu a l’a̍utru
I sei primi mesi ün Segunda Liga (L2) sun stai propi cuma ün brütu sœnu. Â mita̍n d’a stagiu̍n, a sqadra era ü̍rtima d’u campiunatu, ma sut’a direçiu̍n de Marco Simone che avëva rempiaçau Laurent Banide dopu a qinta giurna̍, i Russi e Gianchi a̍n cumençau a anda̍ meyu. Ün deçembre d’u 2011 Dmitry Rybolovlev e̍ arrivau per piya̍ a presidença d’u clüb cun tante bele ambiçiue margradu üna sitüaçiu̍n spurtiva prun cumplica̍ : e̍ stau ün fü̍rmine. De primavera, dopu üna fasa de returnu straudina̍ria, a sqadra a̍ mancau de pocu u terçu postu sino̍nimu d’acessiu̍n ün Prima Liga (L1). Ma l’AS Mu̍negu a̍ devüu speta̍ ancura ün’ana̍ per remunta̍ ün Prima Liga (L1).
De returnu ün Prima Liga (L1)…
De giügnu d’u 2012, Claudio Ranieri e̍ stau recrütau per mena̍ a ben chël’afari. Dopu ave̍ passau u campiunatu üntregu sciü̍ d’u po̍dium, l’AS Mu̍negu a̍ validau u so fütüru returnu tra ë ciü̍ bone sqadre cun üna vito̍ria a Nimes per a 36e̍sima giurna̍. Üna semana dopu, l’AS Mu̍negu e̍ sta̍ sacra̍ Campiuna de França de Segunda Liga (L2) dürante l’ü̍rtima rescontra ün casa contra Le Mans. U 10 d’austu d’u 2013, u clüb a̍ festau u so returnu ün Prima Liga (L1) a Bordeaux.
…e ün Liga d’i Campiui
Segundu d’u campiunatu â fin d’a stagiu̍n 2013-2014, suvrapassandu u so reco̍rd de punti ün Prima Liga (L1), l’AS Mu̍negu s’e̍ sü̍bitu qalifica̍ per a Liga d’i Campiui 2014-2015. Leonardo Jardim arrivau dopu Claudio Ranieri sciü̍ d’u bancu, i Russi e Gianchi a̍n riesciüu u returnu sciü̍ d’u parcu europea̍n razunzendu cusci̍, i qarti de finala dopu ave̍ eliminau ün utavu de finala Arsenal. Ün fin finale, u percursu de l’AS Mu̍negu che ne sta̍ sempre ün mente, e̍ sta̍ arrestau da a Juventus. Per de ciü̍, ünt’u campiunatu l’AS Mu̍negu e̍ riesciüa a fini̍ a u terçu postu margradu üna partença cusci̍ difi̍cila. Dürante a stagiu̍n d’u 2015-2016, u percursu europea̍n s’e̍ vite arrestau ünt’ë prove eliminato̍rie contra Valençia. Ünt’u campiunatu, ün nœvu terçu postu gh’a̍ ufertu ün’a̍utra upurtünita̍ europeana.
2016-2017 • Üna stagiu̍n da nun crede !
Ün 2016-2017, l’AS Mu̍negu a̍ pa lasciau passa̍ a so’ furtüna d’acessiu̍n â fasa de sqadre eliminandu Fenerbahçe e Villareal dürante ün’estae cina d’emuçiue, resültati che permetëvun d’augüra̍ üna stagiu̍n straurdina̍ria. De fati, l’AS Mu̍negu a̍ pairau i sücessi üntantu che Kylian Mbappé e̍ arrivau a i ciü̍ a̍uti niveli. Tottenham, City o ancura u Borussia se sun fai bate da üna sqadra munegasca che s’e̍ aussa̍ finta a iesse tra i qatru ciü̍ boi d’a C1 per a qarta vota d’a so’ sto̍ria. Ünt’u campiunatu, margradu i sforçi d’u PSG, a stagiu̍n s’e̍ finia per l’AS Mu̍negu cun ün utavu ti̍tulu de Campiu̍n !
AS Mu̍negu 2.0
Ün 2017-2018, dopu üna qinta stagiu̍n de se̍ghitu finia sciü̍ d’u po̍dium, üna nœva era prestigiusa s’e̍ drüverta a u mese de lüyu d’u 2020 cun l’arrivu de Niko Kovac sciü̍ d’u bancu. Per a so’ prima stagiu̍n, u te̍cnicu cruatu a̍ sü̍bitu menau l’AS Mu̍negu sciü̍ d’u “po̍dium” a u 3çu postu d’a Prima Liga (L1). Aiço̍ d’aiçi̍ era sino̍nimu de returnu ün Cupa d’Europa e ün finala d’a Cupa de França (batosta 2-0 contra u PSG).
Ün stëssu tempu, u presidente Rybolovlev a̍ creau e finalizau u prugetu de Çentru de Perfurmança. A Diagunala, che devëva permëte a l’AS Mu̍negu d’anda̍ ciü̍ avanti, e l’a̍ fau erige pressu d’u stadi Lui̍ IIndu per ghe acœye i zu̍veni talenti de l’Acade̍mia. Ün de̍ije ani, Dmitry Rybolovlev a̍ strütürau u clüb per ghe permëte d’iniçia̍ i ani 2020 cun ancura ciü̍ d’ambiçiue.
2023-2024 • Ana̍ d’u çentenari
L’ana̍ d’u çentenari se cumença de prun bela manera cun ün segundu postu propi sperau, sino̍nimu de qalificaçiu̍n direta ün Liga d’i Campiui. L’AS Mu̍negu a̍ finiu sta stagiu̍n 2023-2024 a u segundu postu de Prima Liga (L1), resültatu assügürau dopu tre vito̍rie per ë tre ü̍rtime rescontre d’a sqadra : a prima contra Clermont Foot 4-1 a u Stadi Lui̍ llndu, a segunda contra Montpellier HSC 0-2 sciü̍ d’u terre̍n aversari, e ün fin finale, l’AS Mu̍negu a̍ gagnau 4-0 contra u FC Nantes giügandu, ünt’u so stadi, cun prun de zimbu.
