Ani 2000 : Generaçiu̍n Liga d’i Campiui
Ë prime de̍ije anae sença ti̍tulu de Campiu̍n despœi u 1960, sti ani 2000 a̍n vistu l’AS Mu̍negu riesce u so ciü̍ belu percursu europea̍n ma, dopu, a̍ cunusciüu lündema̍n difi̍cili.
U maraviyusu ti̍tulu de l’anu 2000 a̍ lasciau postu a üna stagiu̍n ben menu emuçiunanta. Per primu, l’AS Mu̍negu e̍ sta̍ sü̍bitu elimina̍ a l’iniçi d’a Liga d’i Campiui e a̍ finiu a u 12e̍simu postu d’u campiunatu. Vinti ün finala de Cupa d’a Liga da Lyon (2-1 dopu ë prulungaçiue), i Russi e Gianchi nun a̍n partiçipau per ün tempu a ë cumpetiçiue europeane. Ün 2001, Claude Puel e̍ stau rempiaçau da Didier Deschamps per qü l’iniçi cuma üntrenau̍ e̍ stau difi̍cile cun ün malerusu 15e̍simu postu per a so’ prima stagiu̍n.
2002-2003 • Turna a riüscita
A stagiu̍n seghenta a̍ cumençau cun dificürtae ma i Russi e Gianchi a̍n finiu a u segundu postu d’u campiunatu e a̍n gagnau a Cupa d’a Liga davanti a i 80 000 spetatui d’u Stadi de França, gagnandu de lonzi contra Sochaux. Â fin d’u campiunatu, Shabani Nonda e̍ stau u ciü̍ bon per mëte go̍l, Jérôme Rothen, ëlu, u ciü̍ bon per passa̍ u balu̍n, e prun de zu̍veni tali Squillaci e Evra sun stai nutai cuma fütüri giüga̍iri per a Sqadra de França. Trei ani dopu l’ü̍rtima, l’AS Mu̍negu a̍ gagnau üna nœva cumpetiçiu̍n che gh’a̍ dau u dritu de partiçipa̍ â prestigiusa Liga d’i Campiui. Achëla stagiu̍n e̍ sta̍ tambe̍n marca̍ da a partença de Jean-Louis Campora, dopu vint’œtu anae de presidença prun prusperuse. E̍ stau rempiaçau da Pierre Svara.
L’epupea d’i Russi e Gianchi
Pierre Svara e̍ stau sulu üna stagiu̍n a u postu de presidente ma… qala stagiu̍n ! A prima parte d’u campiunatu e̍ sta̍ briusa, cuma tambe̍n per a fasa de sqadre d’a Liga d’i Campiui unde l’AS Mu̍negu vince l’AEK Athènes, u PSV Eindhoven e u Deportivo La Corogne. Nüsciü̍n a̍ pusciüu ublia̍ u 8-3 contra a furmaçiu̍n spagnola a u Stadi Lui̍ IIndu, giurnu de glo̍ria de l’ataca̍n cruatu Dado Prso che, propi u giurnu d’u so aniversari, a̍ mëssu qatru go̍l. A fasa de returnu e̍ sta̍ erro̍ica, meme se l’aventüra europeana gh’a̍ avüu cunseqençe nefaste sciü̍ d’u resültatu finale d’a Prima Liga (L1). De fati, dopu iesse sta̍ prima sca̍iji tüt’u tempu d’u campiunatu, l’AS Mu̍negu a̍ finiu sulu a u terçu postu. Per a Liga d’i Campiui, l’epupea munegasca de 2003-2004 a̍ marcau üna generaçiu̍n üntrega. L’AS Mu̍negu a̍ eliminau ün dopu l’a̍utru, u Lokomotiv Moscou, u Real Madrid de Zinedine Zidane e u clüb ünglese de Chelsea üntrenau da ün certu Claudio Ranieri. U straurdinari percursu s’e̍ arrestau a Gelsenkirchen unde u FC Porto a̍ duminau a finala e a̍ gagnau 3-0. A cupa “a ë grande auriye” nun e̍ sta̍ gagna̍, ma, achësta sqadra ünt’a qala cada giüga̍ire e̍ ün erroe Roma, Ibarra, Evra, Squillaci, Givet, Rodriguez, Bernardi, Zikos, Plasil, Giuly, Prso, Morientes, Nonda e̍ ientra̍ ünt’a sto̍ria d’u clüb e ünt’a memo̍ria d’i fanfana̍tichi russi e gianchi.
Mumenti sença glo̍ria
Ë stagiue seghente sun stae ciü̍ difi̍cile. Ün menu de çinq’ani, l’ün dopu l’a̍utru, sun passai trei presidenti : Michel Pastor che ün 2008 a̍ lasciau u postu a Jérôme de Bontin che, a u so viru, ün 2009 l’a̍ lasciau a Etienne Franzi e chël’ünstabilita̍ a truvamu tambe̍n per i üntrenaui. Per a stagiu̍n 2005-2006 Francesco Guidolin e̍ arrivau dopu Didier Deschamps, u qale e̍ stau rempiaçau ün 2006-2007 da Lazlo Lölöni che e̍ stau sulu carche semana a fa̍ travaya̍ üna sqadra che fava ciü̍ süna̍ nüsciü̍n ün Prima Liga (L1). Laurent Banide, che s’ucüpava d’a furmaçiu̍n despœi tante stagiue, e̍ devëgnüu üntrenau̍ per pocu tempu, prima che, a l’arba d’a stagiu̍n 2007-2008, l’ex defensu̍ brasilia̍n Ricardo sice arrivau da Bordeaux. Ma a riüscita nun e̍ capita̍ meme se ün stëssu tempu nümerusi zu̍veni talenti sun stai recrütai. Per agiütali a prugredi̍, ün 2009 a̍n fau vegne Guy Lacombe a u postu d’üntrenau̍. A stagiu̍n a̍ cumençau cianciani̍n ma cun prun de determinaçiu̍n. U clüb a̍ finiu cun üna finala de Cupa de França persa dopu ë prulungaçiue contra u PSG (0-1), e a l’utavu postu d’a Prima Liga (L1), u ciü̍ bon resültatu despœi d’u 2004-2005. Margradu tüt’aiço̍ d’aiçi̍, u resciuri̍ a̍ pa dürau perche̍ l’AS Mu̍negu va̍ a cunusce üna stagiu̍n propi brüta.
